Италија е „црна точка“ во Европа кога станува збор за фрлање храна, бидејќи во таа земја се фрла повеќе од половина килограм храна по лице неделно, според италијанските медиуми.

Во споредба со другите европски земји, просечното неделно фрлање храна по Италијанец е 555,8 грама, повеќе од Французите (459,9 грама), Шпанците (446,5 грама), Холанѓаните (469,6 грама) и Германците (512,9 грама), објавува Раи.

Италија е на прво место на ова рангирање, со околу 100 грама фрлена храна по лице повеќе отколку во Шпанија или Франција, според податоците од Cross Country Report 2025 од Waste Watcher International, објавени по повод 13-тиот Национален ден за спречување на фрлање храна.

Позитивната страна е што од 2015 година, просечното неделно фрлање храна по лице во Италија се намали за речиси 100 грама, од 650 грама на 555,8 грама.

Иако свеста за врската помеѓу фрлањето храна и влијанието врз животната средина расте, Италија е сè уште далеку од целта за 2030 година за намалување на фрлањето храна на 369,7 грама неделно.

Според Извештајот за индекс на отпад од храна за 2024 година на UNEP (Програма за животна средина на Обединетите нации), годишно во светот се фрлаат 1,05 милијарди тони храна, што е една третина од глобалното производство.

Просечното фрлање храна од околу 80 килограми годишно по лице значи огромна финансиска загуба. Според проценките на организациите што се занимаваат со фрлање храна, секое семејство во Италија губи од 500 до 600 евра годишно на фрлање храна.