Продуктите што ги прави битолска Квасара лани донеле зголемен приход за 15 отсто во однос на 2019 година. Вкупната продажба надмина 7,6 милиони евра, а оперативната добивка е 206.000 евра

Квасецот во различни форми и величини на единствената домашна фабрика за квас и шпирт од Битола лани беше полн погодок на домашниот пазар. Со стартот на мерките, вонредната состојба започна и кумулирање залихи кај гаѓаните кои во првиот налет купуваат се и сешто за во домашните магацини. Во тие потрошувачки бранови меѓу другите основни домашни продукти свое заслужено место имаше и квасот на битолска „Квасара“.

Според официјалните финансиските податоци од билансот на успех битолската Фабрика за квасец и алкохол лани остварила приходи од продажба во вкупна вредност од 7,6 милиони евра што е за 1 милион евра повеќе од претходната споредбена година. Тоа значи дека во минатата година продажбата пораснала за 15 отсто.

На страната на расходите лани доминирале потрошените материјали и ситен инвентар за што друштвото издвоило 3,7 милиони евра што е раст за речиси 20 отсто во споредба со претходната споредбена година. За вработените лани „Квасара“ исплатила 1,15 милиони евра што е безмалку на исто ниво во однос на 2019 година. За останати расходи од дејноста компанијата исплатила 2,2 милиони евра.

Оперативната добивка на битолската „Квасара“ лани изнесува 206.000 евра, а резултатот е неспоредлив со претходната година кога завршиле со загуба од 80.000 евра.

Финансиските расходи на компанијата негативно влијаат врз нето добивката. Лани нивниот износ бил 113.000 евра што е за околу 20 отсто повеќе од 2019 година. Финансиските приходи изнесувале 2.700 евра и се за 8 пати намалени во споредба со 2019 година. Нето добивката на Квасара лани изнесува 48.000 евра 

Акцијата на „Квасара“ на берза последно се тргува по цена од 13.000 денари што е најниска цена во период од една година тргување. Последен пат е тргувана акцијата вчера, а за една година прометот е околу 85.000 евра.

Што ја прави посебна битолската Квасара?

Освен што е единствена што произведува квасец и спирт оваа компанија е една од ретките во земјава која и по 25 години од транзицијата од плански во пазарен систем уште на одреден начин се води како во време на самоуправувањето. Компанијата има над 240 акционери – домашни физички лица кои поседуваат 97,7 отсто од акциите со право на глас и нема ниту еден акционер кој поседува над 5 отсто од управувачките права. Компанијата има издадено 12.500 акции со право на глас.