Новиот член на Управниот одбор на АЛТА Банка АД Битола, Зaрије Коралија, има повеќе од 20 години искуство во банкарскиот и финансискиот сектор во Србија, каде што кариерата ја започнал од основни оперативни позиции, а со текот на времето напредувал до раководни функции.

Тој е дипломиран инженер по организациски науки со магистерски студии од областа на менаџмент, како и дипломиран економист во областа на финансии, банкарство и берзанско работење. Во моментов ја извршува функцијата директор на сектор за управување и поддршка на продажба за физички лица, микро и агро клиенти во Алта банка АД Белград.

Според доставената биографија, неговото искуство опфаќа развој на продажни стратегии, анализа на финансиски резултати, управување со комерцијални активности и унапредување на банкарски производи и услуги. Во рамки на својата работа активно учествува во подобрување на перформансите на експозитурите и оптимизација на деловните процеси. Кандидатот поседува солидно познавање на корпоративното управување, финансиската состојба и ризичниот профил на банката, како и искуство во соработка со регулаторни институции. Се оценува дека неговите компетенции и професионален интегритет ќе придонесат за стабилно и ефикасно работење на АЛТА Банка АД Битола.

Според информациите објавени на Македонската берза, именувањето следува по претходно донесена одлука на Надзорниот одбор на Банката од 23 јануари 2026 година, како и по добиената согласност од Народната банка на 19 март 2026 година. Во УО членува уште и Александра Радевска како претседател.