Трошоците на живот и цените на мало во јуни во однос на мај годинава останале исти.

Споредено со јуни лани се намалени за 0,7 проценти, објави денеска Државниот завод за статистика.

Пораст на трошоците на живот во јуни годинава, во споредба со претходниот месец, е забележан кај свежото и разладеното овошје за 11 проценти, тутунот за 5,8 проценти, другите прехранбени производи за 0,5 проценти, јајцата за 0,4 проценти и маслото и маснотиите за 0,2 процента.

Во јуни пораст на трошоците на животот е евидентиран и кај течните горива за домаќинствата за 9,6 проценти, течните горива и мазива за домаќинствата за 3,2 процента, гасот за домаќинствата за 2,8 проценти, услугите за сместување за 1,1 процент, големите електрични апарати за 0,9 проценти, малите електрични апарати за 0,6 проценти, обувките, другите медицински производи и специјалистичките прегледи за 0,3 проценти, терапевтските апарати и опрема и информатичката опрема за 0,2 процента.

Намалување на трошоците на животот во јуни споредено со мај годинава е регистрирано кај свежиот и разладен зеленчук освен компирот за 8,9 проценти, шеќерот, џемот, медот, чоколадата и кондиторските производи за 1,3 проценти. Кај другите пекарски производи за 0,9 проценти, сушеното, соленото и чаденото месо, сувото овошје и јаткастите производи за 0,5 проценти, рибата и морските плодови и замрзнатиот зеленчук освен компирот за 0,3 проценти и безалкохолните пијалаци за 0,2 процента. Пониски трошоци на живот се забележани и кај авионскиот превоз на патници за 10,8 проценти, болничките услуги за 4,8 проценти, туристичките пакет-аранжмани за 2,6 проценти и градините, растенијата и цвеќињата за 1,2 проценти.