Во популарна Фејсбук група посветена на љубителите на Грција и летувањето во таа земја, еден од членовите сподели како во пракса функционира системот за електронска евиденција на влез и излез (EES) на грчката граница – каде се застанува, како се земаат отпечатоци од прсти и како изгледа фотографирањето пред преминување на границата.

„Кога ќе се предаде пасошот, автомобилот се паркира во десната лента, а патниците влегуваат во ходник пред канцеларијата на граничната полиција. Има две машини за фотографирање и оставање отпечатоци од прсти, па истовремено се обработуваат по две лица од една колона автомобили“, напишал членот на групата.

Тој додава дека постапката не трае долго и завршува релативно брзо, но сепак го удвојува времето потребно за премин во споредба со класичната пасошка контрола, со дополнително паркирање и излегување од возилото.

„Сето тоа изгледа тешко изводливо во шпицот на сезоната, во јули и август, кога гужвите се огромни“, наведува тој.

Во објавата се посочува и интересен детал – фотографирањето не било побарано при влез во Грција, туку при излез од земјата.

„Го прашав цариникот и тој ми потврди дека овој вид идентификација важи за цела Европа. Лично, ми делува како да сум се фотографирал за електронска лична карта на ЕУ“, додава членот на групата.