Грчкиот министер за надворешни работи Никос Коѕијас по добиената позитивна препорака од Европската комисија за Република Македонија да ги започне преговорите за членство во ЕУ јасно посочи дека крајната одлука ја носи Европскиот совет, а не комисијата и дека таму Грција ги има поставено своите веќе познати позиции. 

Тоа значи дека Грција повторно ќе ја блокира Македонија, како во ЕУ, така и во НАТО, се додека не се реши спорот за името без оглед што двете страни ја зголемија бројката на меѓусебни средби и презедоа повеќе чекори за градење на доверба.

Коѕијас исто така тврди дека нема никакви шанси Македонија да стане членка на НАТО на самитот кој е планирано да се одржи во јули бидејќи е многу доцна за такво нешто. Македонија според него, се уште не ги прифатила грчките барања за промена на Уставот, како и за сеопфатна „ерга омнес“ употреба на новото договорено име меѓу двете страни.