Во време кога жителите на Општина Кочани жестоко се противат на музика во нивниот град, В.Д. градоначалникот Венко Крстевски потпиша рамковен договор од над 1 милион денари, или околу 19 илјади евра за изнајмување бина, озвучување и осветлување на културни и други настани организирани oд Општина Кочани.

Договорот е потпишан со фирмата Алфа Саунд од Кочани и е потпишан за во следните 12 месеци.

Но, цените двојно поголеми за разлика од 2022 година и нешто повисоки за разлика од 2023 и 2024 година, иако се работи за буквално истата јавна набавка. Па така, ако во 2022 година, бина – алуминиумска конструкција со кров, 8 на 6 метри, со по две појачала од по 1200, 900 и 750, шеснаесет звучни кутии од 400 вати, миксета со 32 влеза, пет микрофони за тапани, исто толку вокални микрофони и микрофони за инструменти, осветлување, рефлектори во минимум 15 бои и агрегат од три киловати по потреба чинеле 123 илјади денари, во 2024 година, сумата била 175 илјади денари, а во 2025 година, 210 илјади денари.

Бината од среден тип пак, во 2022 година чинела 78 илјади денари. Во 2024 година, истата била 95 илјади, а годинава, 118 илјади денари. ЛЕД екраните од 42 метри квадратни во 2022 година чинеле 52 илјади денари, во 2024 година, сумата скокнала на 70 илјади, а во 2025 година, 82 илјади денари.

Во 2023 и 2024 година, сумата останала иста. Овие пари се предвидени да се трошат за Денови на кочанскиот ориз, новогодишен конценрт, хуманитарни концерти и други настани.

Во договорот е предвидена и забавата која в.д. градоначалникот Крстевски ја најави за Петровден – празникот на градот Кочани, но не се одржа под притисок на жителите.