Директорот на АД „Пошта“, Орхан Куртиши, тврди дека состојбата во компанијата се стабилизира, нагласувајќи дека во изминатите две години платите доцнеле само еднаш.

-Во двете години откако сум директор, платата доцнела само еден месец и тоа во законскиот рок. Доцневме само еден ден – на 16-ти им ги исплативме платите. Се стабилизираме – изјави вчера  Куртиши.

Поштата вчера доби 100 нови возила, инвестиција вредна околу два милиони евра, но и понатаму се соочува со сериозни предизвици. Просечната возраст на вработените е 55 години, а во минатото недостигот на возила и поштари довел до тоа околу 600 илјади пратки да останат во магацините.

Според раководството, лошите услови за работа придонеле минатата година компанијата да заврши со загуба од околу 5 милиони евра.

Куртиши најави нови вработувања во техничкиот дел.

-Во 2025 година вработивме, а оваа година планираме уште 120 нови вработувања – во делот на дистрибуција, возачи и технички персонал. Направивме скенирање на состојбата и дел од проблемите веќе ги решивме – рече тој.

Министерот за транспорт, Александар Николоски, оцени дека Поштата била запоставена од претходната власт, но најави дека институцијата ќе се развива како државен ресурс.

-Над 75% од финансискиот промет во државата го прави Поштата, но приходите не го следат тоа. Либерализацијата создаде монопол кај приватните пошти, кои ги преземаат најпрофитабилните услуги – изјави Николоски.

Ревизорски извештаи покажуваат дека АД „Пошта“ со години бележи загуби и се наоѓа во неповолна финансиска состојба. Од 2017 година наваму, компанијата работи со оперативни загуби, а најголемата е регистрирана во 2022 година – над 3,7 милиони евра.

Дополнително, ефикасноста на доставата останува проблематична. Само 59,7% од пратките се доставени навреме, што е под стандардите на Универзалната поштенска унија.

Новиот менаџмент очекува дека со модернизација, нови вработувања и рационализација на трошоците ќе се подобри ефикасноста и ќе се стабилизира финансиската состојба на компанијата.