ЌЕ СЕ ОТПИШАТ КАМАТИТЕ И ЌЕ СЕ ДОЗВОЛИ ПЛАЌАЊЕ НА ГЛАВНИЦАТА НА РАТИ - за јавните установи задолжително, за приватните само апел
Каматите ќе се отпишат, а главницата на долгот ќе се исплаќа на повеќе рати. Премиерот Зоран Заев денеска ја соопшти најновата владина мерка. Преку 150.000 граѓани ќе бидат опфатени со законот за отпис на камати и репрограмирање на долгови и трошоци на граѓаните во услови на КОВИД-19 чиј предлог-текст е усвоен на денешната владина седница. Законот ќе овозможи граѓаните да ја исплатат само главницата на долгот на повеќе рати.
Државните органи и јавните институции опфатени со законот, како и УЈП, се должни да го утврдат износот на главниот долг, трошоците и каматата за секој граѓанин во рок од 90 дена од влегување во сила на законот. Потоа, најдоцна за 15 дена ќе треба да ги известат физичките лица - нивни должници со јавна објава на официјалните веб страници, преку медиуми или на друг начин.
„Со законот се уредуваат условите, начинот и постапката за отпишување на пресметани камати по основ на долгови на физички лица кон државните органи и јавните институции и даночни долгови, како и репорограмирање на галвниот долг и трошоци на физичките лица кои доспеале за плаќање заклучно со денот на влегување во сила на овој закон“, рече Заев.
Според премиерот, законското решение нема да има финансиски импликации, туку напротив, ќе донесе само позитивен импакт. Тој вели дека ова законско решение е еднократна помош за решавање на проблемот на граѓаните кои со задоцнетото плаќање или неплаќање на долговите, акумулирале дополнителен долг врз основа на каматите. Законот ги опфаќа пред се посиромашните.
Овој закон, потсети премиерот, беше вклучен во петиот пакет мерки и со него уште еднаш се потврдува грижата што ја води Владата за граѓаните во услови на корона криза.
Заев ги повика приватните компании да демонстрираат општествена одговорност и на ист ваков начин да им излезат во пресрет на граѓаните.
„Како Влада немаме право да им наложиме на приватните компании ваква законска обврска, но апелираме да го следат овој пример на доброволна основа, да демонстрираат општествена одговорност и да им излезат во пресрет на граѓаните, да покажат разбирање за причините поради кои тие задоцниле со плаќање на обврските кон нив“, истакна Заев.
Слично
Поврзани вести
