Турската Влада ја заострува контролата на интернетот. Новите предложени законски измени на турската владејачка Партија за слобода и правда ќе му обезбедат овластувања на министерот за транспорт и врски да ги блокира веб-сајтовите што ќе ја нарушуваат приватноста. Освен ова, со нив се принудуваат интернет провајдерите да чуваат информации за активностите на своите клиенти во мрежата и по потреба да го ограничат пристапот до сајтовите. Професорот по право на истанбулскиот Универзитет „Билги“, Јаман Акдениз е уверен дека новите мерки се политички мотивирани и имаат за цел да го прекинат слободниот проток на информации преку Интернет. Новиот закон може да го спречи објавувањето на интернет на информациите за корумпираност на високи чиновници и бизнисмени во Турција. Во Турција веќе дејствуваат филтри за заштита на децата од штетна информации, а за последните шест месеци Турција упатила 1.673 молби до „Гугл“ за отстранување на материјали. Оваа бројка три пати го надминува просекот на другите земји.