Иако не е толку медиумски експониран како неговите американски конкуренти, кинескиот конгломерат Aviation Industry Corporation of China (AVIC) е втората најмоќна компанија во светот во областа на воздухопловството и одбранбената индустрија. Пред него се наоѓа само американскиот гигант „Локид Мартин“, најголемиот производител и продавач на оружје во светот.

AVIC има седиште во Пекинг и вработува околу 500.000 луѓе, што го прави еден од најголемите индустриски системи во оваа област. Компанијата произведува речиси сè што е поврзано со воздухопловството и воената технологија.

Меѓу главните производи на AVIC се:

• воени авиони (ловци, бомбардери и транспортни авиони)

• цивилни авиони и авио-компоненти

• хеликоптери

• беспилотни летала (дронови)

• авионски мотори и системи

• електроника и радарска технологија

Покрај тоа, компанијата има поширок индустриски портфолио кое вклучува и бродоградба и автомобилски компоненти.

AVIC функционира според модел кој се разликува од западните конкуренти. Како државна компанија, таа е дел од пошироката кинеска стратегија за модернизација на војската и индустријата. Овој пристап овозможува долгорочно планирање и стабилно финансирање, без притисок од краткорочни пазарни резултати. Компанијата управува со широка мрежа на истражувачки институти и производствени капацитети, што овозможува побрзо воведување на нови технологии.

Меѓу најпознатите производи на AVIC се:

• Chengdu J-20 – кинески стелт ловец од петта генерација

• Shenyang J-15 – борбен авион наменет за носачи на авиони

• Xian Y-20 – тежок транспортен авион

• Harbin Z-20 – повеќенаменски хеликоптер

Една од клучните разлики меѓу западниот и кинескиот модел е пристапот кон иновациите. Американските компании се потпираат на конкуренцијата и приватниот сектор како двигатели на развојот, додека Кина користи централизирано управување и индустриска политика за побрзо технолошко напредување.

Иако САД и натаму имаат предност во области како што се авионските мотори и напредната електроника, Кина значително го намалува технолошкиот јаз, особено во сегментот на беспилотни летала и масовното производство.

Ривалството меѓу двете сили се одразува и на глобалниот пазар. Американските компании доминираат меѓу традиционалните сојузници и развиените земји, додека AVIC се шири во Африка, Азија и на Блискиот Исток, нудејќи пониски цени и пофлексибилни услови за соработка.

Со годишен приход од околу 44 милијарди долари, AVIC станува сериозен играч во глобалната одбранбена индустрија и постепено се приближува до позицијата на американскиот гигант „Локид Мартин“.

Забрзаниот развој на кинеската индустрија укажува дека глобалната рамнотежа во воздухопловството се менува, а се поизвесно е создавање на два паралелни системи во авио-индустријата – еден базиран на пазарот и друг на државно планирање.