Aлтернативниот министер за надворешни работи на Грција, Јоргос Катругалос, во интервју за грчката телевизија Скај, ги повтори позициите на официјална Атина и рече дека прозорецот на можност е отворен, но топката е на страната на соседната земја, ако излезе во пресрет ќе има договор. 

„Сакаме комплетно решение за да не се создаде одново проблем во следната деценија и сакаме решение што ќе има карактеристика на трајност и затоа е потребна промена на Уставот. Доколку другата страна се одзве на ова, ќе имаме договор, ако не, нема да имаме. Топката,  јасно дека е на нејзина страна“- вели Катругалос.

Како што јави дописничката на МИА од Атина, тој коментира дека не станува збор за лесни преговори, тоа е нешто што го знаеле уште од почеток, а изрази надеж дека на крај ќе се постигне договор.

„Постои напредок, не постои слика дека стигнуваме до ѕид и дека за она што го предлагаме не се разговара“ - рече тој. 

Додава дека постојат разговори, во доста точки остануваат на почетните позиции, во други точки се поместуваат.