Катар објави дека потпишал 15-годишен договор со Германија за снабдување на земјата со природен течен гас, во екот на светската енергетска криза предизвикана од војната во Украина.

Договорот меѓу катарската државна фирма „Катар енерџи“ и американската компанија „КонкоФилипс“ ќе придонесе за напорите за поддршка на енергетската безбедност во Германија и Европа, изјави на прес-конференција катарската министерка за енергетика Саад Шерида Ал-Кааби.

Според договорот, Катар ќе испорачува до два милиони тони течен природен гас (ЛНГ) годишно од 2026 година до гасниот терминал во изградба во Брунсбител на северот на Германија, рече министерот, а пренесува Франс прес.

ConocoPhillips има удел во морското поле на гас во Катар во Персискиот Залив, кое Катар го дели со Иран, пренесува АП.

Германија, која беше водечки увозник на руски гас пред почетокот на војната во Украина, од крајот на август не доби ниту една испорака на гас од Русија, објавува „Данас.рс“.

Германија гради пет терминали за течен природен гас како клучен дел од планот за замена на испораките на руски гас, а првиот терминал се очекува да биде оперативен наскоро. Повеќето од сегашните испораки на гас за Германија доаѓаат преку Норвешка, Холандија и Белгија.

Како дел од напорите на Германија да го спречи краткорочниот недостиг на енергија, се вклучени и привременото реактивирање на термоцентралите на јаглен и продолжувањето на работата на три нуклеарни централи кои требаше да бидат затворени до крајот на оваа година. 

Кина, Јапонија и Јужна Кореја се главните пазари за гас во Катар, додека европските земји сè повеќе бараат договори со Доха од почетокот на руската инвазија на Украина во обид да обезбедат различни извори на енергија.