Војната на Блискиот Исток, иако првично изгледаше како дополнителен товар за Украина, во меѓувреме ѝ донесе и неочекувани геополитички и економски придобивки. Украинскиот претседател Володимир Зеленски успеа да ја искористи новата ситуација за зајакнување на меѓународната позиција на земјата, пишува Би-Би-Си.

За време на посетата на Саудиска Арабија во март, Зеленски нагласи дека целта е „зајакнување на заштитата на животите“, но истовремено ги промовираше украинските воени искуства, особено во областа на беспилотните летала. Украина веќе потпишала договори за соработка со Саудиска Арабија, Обединетите Арапски Емирати и Катар, кои се однесуваат на размена на технологии и знаење во одбраната од дронови.

• „Сакаме да им помогнеме на земјите од Заливот во одбраната. Ќе продолжиме да градиме вакви партнерства“ – изјави Зеленски.

Во почетокот, конфликтот во Иран изгледаше како негативен фактор за Киев, бидејќи постоеше ризик да го одвлече вниманието на САД од војната во Украина, додека Русија профитираше од зголемените цени на нафтата. Поради блокадата на Ормускиот теснец, Москва успеа да извезува повеќе нафта по повисоки цени, што ѝ обезбеди дополнителни средства за финансирање на војната.

Сепак, Украина успеа да го сврти развојот во своја корист. Зеленски истакна дека нападите со евтини дронови, како и нивното пресретнување со значително поевтини системи, стануваат клучен фактор во модерното војување. Ова искуство предизвика зголемен интерес кај земјите од НАТО и доведе до нови договори за одбранбена соработка со европските партнери.

Во април, Украина потпиша договор со Норвешка вреден 8,6 милијарди долари, како дел од поширок пакет поддршка до 2030 година, како и договор со Германија вреден 4,7 милијарди долари за набавка на дронови, ракети и софтвер.

Дополнително, Киев ја примени лекцијата од Блискиот Исток и ги засили нападите врз руската енергетска инфраструктура. Според украинските власти, овие напади предизвикале милијардски загуби за Русија, намалувајќи ги приходите од извоз на нафта и делумно неутрализирајќи ги придобивките од повисоките цени.

Како уште еден позитивен ефект, Европската Унија конечно одобри заем од 90 милијарди евра за Украина, кој претходно беше блокиран. Овој потег дојде по политичките промени во Унгарија, што овозможи деблокирање на средствата потребни за воена опрема.

И покрај овие придобивки, мировните преговори остануваат неизвесни. Администрацијата на Доналд Трамп е фокусирана на Блискиот Исток, додека украинските власти предупредуваат дека вистински напредок во преговорите со Русија ќе биде тешко да се постигне додека трае конфликтот со Иран.

Во меѓувреме, Европа изразува загриженост дека Русија ја користи ситуацијата за засилување на нападите и зајакнување на својата позиција, што дополнително ја комплицира безбедносната состојба на континентот.