Лидерите од Г-20 се согласија на средбата во Кина, дека е потребно да работат заедно за зајакнување на светскиот економски раст, изјави германскиот канцелар Ангела Меркел, цитирана од агенциите.

Меркел ја поздрави концентрацијата на Кина врз структурните реформи за време на ротирачкото претседателство на групата и изјави дека министрите за дигиталната политика на 20-те најголеми економии во светот ќе се состанат за првпат догодина кога Германија ќе го преземе претседавањето со Г 20.

Според неа Г-20, исто така, планира да формира работна група за иновации.

Заменик-генералниот секретар на јапонската влада Коичи Хагиуда рече дека земјите од групата се на пат да се договорат дека би требало да се користат сите политички мерки, вклучително и монетарни, фискални и структурни реформи за постигнување на стабилен и одржлив раст, пренесоа агенциите .

Тој изјави на маргините на самитот на Г-20 дека учесниците исто така се на пат да се договорат во соопштение дека е потребно да се обезбеди безбедноста на мултилатерален трговски систем, за да се промовира слободната трговија.

Покрај тоа, сите земји од Групата се очекува да се приклучат на мировен договор за климата.

„Ангажирани сме да ги доведеме до крај сите внатрешни процедури за да се приклучиме кон мировен договор за климата што е можно поскоро, кога националните процедури го овозможуваат тоа“, пишува во проектот.

Американскиот претседател Барак Обама и кинескиот колега Си Цзинпин заедно ги предадоа документите за пристапување на нивните земји кон договорот вчера, со што вкупниот број на ратификувани држави стана 26. Договорот ќе стапи во сила 30 дена откако ќе биде ратификуван од 55 земји, кои имаат удел од најмалку 55% ​​од глобалните емисии на стакленички гасови.