Нови возови, субвенционирани билети и обновени линии и МЖ Транспорт пак работи со загуба. Тоа е основен показател дека железничкиот сообраќај во Македонија е во голем пад во последните неколку години каде проблемите само се таложеа и се влошуваше состојбата како со инфраструктурата така и со намалување на бројот на патници. Владата вчера ги разгледуваше токму извештаите за работењето во првиот квартал од оваа година на ЈП МЖ Инфраструктура и на Македонски железници – Транспорт А.Д. – Скопје.

Посебна точка на седницата беше барањето на Македонски железници – Транспорт А.Д. Скопје, Владата да донесе одлука за доделување финансиска помош за ова акционерско друштво за подобрување на финансиската состојба и покривање на загубите до крајот на годината.

Заради високиот долг и загуби во работењето на МЖ Транспорт А.Д. – Скопје, Владата им препорача на Министерството за транспорт и врски и на Министерството за финансии, заедно со МЖ Транспорт А.Д. – Скопје да се изнајдат решение за трајно надминување на оваа состојба.

Потенцијал секако, има но, пред владата и МЖ Транспорт ќе биде исправена доста тешка задача за брзо подобрување на состојбите и враќање на профитабилноста или барем намалување на загубите со цел да нема нови штрајкови и незадоволство кај вработените, како и да се мисли на подобрување на инфраструктурата.