Очигледно дека Димитар Хаџи Мишев заборави дека ќе ги мери силите со многу силни противници кои имаа да изгубат многу повеќе од него. Тоа го покажаа и со потегот дека отидоа на отпис на 90 отсто од нивните побарувања во ТЕ-ТО каменот на сопнување кој всушност е каменот околу врат на екипата што ја води „Топлификација“.

Искусниот инженер и долгогодишен директор на скопска „Топлификација“ премногу верувал на своите правни советници и на македонскиот правосуден систем. Епилогот е катастрофален за него и стотици мали акционери на „Топлификација“, компанијата падна во стечај

Димитар Хаџи Мишев и неговите приврзаници имаат само теоретски шанси да се вратат во нормала во правната судска заврзлама на релација „Топлификација“ , ТЕ-ТО, БЕГ и „Битар Холдинг лимитед“. Зададен им е силен и голем удар кој со боксерски речник најточно е „нок даун“. Ситуација во која судијата подвиткан стои над легнатиот запенет и испотен боксер кој делува дека не знае кај се наоѓа и му брои. Токму оваа позиција е синоним за веста дека судот отворил стечај за „Топлификација“.