Европа останува еден од најатрактивните пазари за инвестиции и вработување. Само во Европската Унија, странските инвеститори држат речиси 10.000 милијарди евра директни инвестиции.

Сепак, политичката и регулаторната фрагментација го прави изборот на земја за проширување на бизнисот сè посложен.

Според нова студија на Конференцискиот борд, глобален центар за истражување на бизнисот, Данска е најатрактивната европска земја за вработување во 2026 година. Нејзината предност е силниот екосистем на вештини, високата продуктивност и умерените трошоци за работна сила.

На второ место е Швајцарија, која постигна максимални 100 поени во категоријата талент и вештини, но сепак останува предизвикувачка поради високите трошоци за живот и водење бизнис. Ирска е трета, благодарение на својот флексибилен пазар на трудот и силната деловна култура.

Листата на првите 10 е главно составена од земји од Северна Европа и помали, но богати економии, кои се издвојуваат по својата прилагодливост, стабилни институции и квалитетна работна сила.

Германија е единствената земја од Г7 што е меѓу првите десет. Сепак, таа се соочува со пад на бројот на работоспособно население, зголемување на трошоците за работна сила и бавен процес на дигитализација. Конкурентноста на работната сила беше оценета особено лошо.

Обединетото Кралство е рангирано на 12-то место. Продолжува да страда од ефектите од несигурноста на регулативата по Брегзит, но задржува силен потенцијал благодарение на флексибилниот пазар на трудот, развиениот услужен сектор и богатата база на таленти.

Франција е на 18-то место и е ограничена од регулативи, сложена администрација и недостаток на флексибилност на пазарот на трудот.

Италија, која е на 20-то место на листата, не страда од недостаток на вештини, туку од слаба конверзија на знаењето во продуктивност, бавни иновации и предизвици во управувањето, oбјави Б92.

На самото дно на рангирањето се Кипар, Грција, Хрватска, Полска, Словачка и Бугарија, кои освоија помалку од 30 поени.

foto freepik.com/aleksandarlittlewolf