До крајот на годината Србија ќе започне со изградба на гасоводот Јужен тек на нејзина територија, изјави српскиот амбасадор во Москва Славенко Терзиќ. „Јужен тек е проект кој има статус на национален приоритет за Србија. Тоа е исклучително важен проект не само за нашата земја, туку и за други земји во јужниот дел на Европа. Очекуваме дека изградбата на Јужен тек ќе започне до крајот на годината“, изјави Терзиќ. Тој смета дека и Бугарија ги очекува резултатите од вонредните парламентарни избори в недела, а потоа ќе донесе конечна одлука за судбината на гасоводот на бугарска територија. Официјална Софија ги стопираше плановите за изградба на Јужен тек, поради спротивставувањето на Европската унија. Јужен тек е инфраструктурен проект на руската компанија Гаспром. Гасоводот со капацитет од 63 милијарди кубни метри гас треба да поминува по дното на Црното Море, кон земјите од јужна и централна Европа. Првите испораки на гас преку овој гасовод беше планирано да се случат во 2016 година, а во 2018 година да се достигне полниот капацитет за транспорт на природен гас. Заради спротивставувањето на ЕУ и заладените односи меѓу Москва и Брисел, ваквите планови се неизвесни и покрај најавите од Русија дека не се откажува од проектот.