Компаниите BOSQAR INVEST и Fortenova Group денес објавија дека потпишале договор за купување на 100% од уделот во производителот на месо „PIK Vrbovac“. По завршувањето на трансакцијата, ПИК Врбовац ќе се приклучи кон вертикалата „Future Food“ на Bosqar, заедно со Panvita Grup, водечка словенечка агро-прехранбена група, и Mlinar Grup, водечка регионална пекарска група во регионот на Адријатикот.

Според соопштението, трансакцијата ќе се спроведе во партнерство со постојните акционери, семејството Поланич, а конечната цена ќе биде утврдена при финализирањето на договорот.

– „Потпишувањето на SPA договорот е важен чекор во планираното преземање на ПИК Врбовац и развојот на нашата прехранбена вертикала. Со ПИК Врбовац, Panvita и Mlinar можеме да создадеме силна регионална платформа за храна и земјоделство насочена кон долгогодишен раст, оперативна извонредност и зајакнување на отпорноста на синџирите на снабдување“, изјави Дарко Хорват, претседател на Управниот одбор на BOSQAR d.d.

По добивањето на сите регулаторни одобренија, вертикалата „Future Food“ треба да стане водечка група за свежа храна во регионот, со проценети приходи од околу 640 милиони евра и 4.800 вработени според финансиските извештаи за 2024 година.

Обединетиот систем ќе вклучува неколку фарми, годишно производство поголемо од 120.000 тони месо, овошје, зеленчук и пекарски производи, три големи преработувачки капацитети и околу 120.000 свињи и 4,5 милиони бројлери.

Очекувано, по завршувањето на трансакцијата, Bosqar Invest ќе оствари повеќе од милијарда евра годишни приходи и над 100 милиони евра EBITDA на консолидирана основа во 2026 година.