Комбинатот за феролегури „Југохром“ од Јегуновце бара уште две години продолжување на рокот до кој треба да ги воведе потребните еколошки стандарди за да обезбеди А-интегрирана еколошка дозвола. Од „Југохром“ барањето го доставиле вчера до Министерството за животна средина и просторно планирање, на ден пред истекот на рокот до кој фабриката требаше да го усогласи работењето со европските стандарди и македонските закони. Фабриката не е ниту во почетна фаза за изградба на потребните филтри, а досега неколкупати добиваше продолжување на рокот од институциите. Барањето денеска го разгледува Владата на седницата што е во тек. Во комбинатот работат околу 1.200 работници. Скопската железарница „Макстил“, која е во слична позиција, денеска објави дека ќе ја прекине работата во својот оддел за производство на челик, додека не ги исполни потребните стандарди. Сепак „Макстил“ е во напредна фаза на исградба на филтрите, па очекува во јануари да продолжи со работа.