Mинистерот за одбрана, Зоран Јолевски денеска во Виена изјави дека Македонија се докажа како сериозен партнер во справувањето со безбедносните предизвици.

Тој вели дека земјава ги споделува проценките за безбедноста и континуирано дава значаен придонес кон евроатлантската стабилност. Македонија активно придонесува и во рамките на колективните напори за справување со современите предизвици, закани и ризици.

„Државните институции дејствуваат координирано и имаат воспоставено добра координација и соработка со земјите долж Балканската рута. Убедени сме дека нашите напори ќе бидат соодветно вреднувани и дека Македонија ќе го добие своето заслуженото место во евроатлантското семејство“ - вели Јолевски.

Според него, земјава на соодветен начин се справи со бегалците и мигрантската криза.

Во Виена беше истакната и важноста на Македонија во справувањето со миграциските текови.

На состанокот учествуваат министрите за одбрана на Австрија, Македонија, Чешка, Хрватска, Унгарија, Црна Гора, Србија, Словенија и Словачка. Австрија како актуелен претседавач и координатор со ЦЕДЦ ќе ја информира Европската унија и меѓународните партнери за прогресот и нивната интеграција во натамошните активности.