Сопственикот на „Фокус“ и познатиот новинар, Никола Младенов загина во несреќен случај, соопшти Јавното обвинителство.

Обвинителството донесе заклучок дека според сите докази произлегува дека станува збор за сообраќајна несреќа и дека нема основа дека смртта на Младенов е производ на кривично дело, изјави Гордана Гешковска, шеф на скопското обвинителство.

Возилото кое го управувал  Никола Младенов не било лоцирано според мобилниот телефон, како што беше првично соопштено . Несреќата била пријавена од две лица кои се движеле по автопатот Велес - Скопје.

Обвинителството нема сознанија каде се наоѓал Младенов во критичната ноќ, ниту пак каде  бил неговиот мобилен телефон кој се уште не е пронајден.

„Не е утврдено каде бил Младенов од разговорот со неговата сопруга. Од листата на повици од телефонот, кој ни го посочи сопругата, последниот повик што е регистриран е во 16 часот на 26 март“,вели Гешковска.

Судската медицина не може ниту со прецизност   да го утврди точното  време кога настапила смртта. Според изјавите на обвинителката, пак, од истрагата не е утврдено ниту времето на смртта, таа сè уште е заведена ноќта помеѓу 26 и 27 март.

„Од обдукциониот наод е констатирано дека на телото на Младенов биле забележливи поголем број надворешни повреди, а фатално било раскинувањето на аортата. Според вештаците од судска медицина, кај сообраќајните несреќи што настануваат поради неприспособена брзина најчеста причина за смрт е кинењето на аортата, што го запира функционирањето на сите витални органи“, појасни Гешковска.