Владата во Србија на почетокот на февруари треба да ги разгледа краткорочните мерки за спас на српскиот авиопревозник, пишува денешен „Блиц“.

Според весникот, работната група за анализа на состојбата и подготовка на предлози за стабилизација и заздравување на „Јат ервејз“ овие денови подготвува освен краткорочна, работи и на долгорочна стратегија за конечно решавање на прашањето за судбината на оваа компанија.

Мерките кои работната група наскоро ќе и ги понуди на Владата се однесуваат на тоа дали „Јат“ треба и натаму да биде национален авиопревозник или нискобуџетна компанија, тврди изворот на „Блиц“.

Исто така, појасно ќе се одреди и во однос на тоа што всушност е она што оваа компанија профитабилно може да го работи, дали е исплатливо да се размислува и натаму за интерконтинентални летови или ќе се преориентира на пазарот во опкружувањето.

Бројот на вработени во ЈАТ во моментот изнесува 1.300, а според најавите тој треба да се редуцира до 600 вработени.