Во рамки на полициската акција „Шпион“ МВР поднесе кривична пријава за 20 лица за кривичните дела шпионажа, злосторничко здружување, злоупотреба на службената положба и овластување, уцена и закана, соопшти на денешната прес-конференција министерката за внатрешни работи, Гордана Јанкуловска. Таа откри дека организираната група започнала со работа уште во 2005 година кога првоосомничениот Марјан Ефремов, добил отказ од Агенцијата за разузнавање. Тој се здружил со второ и трето осомничените кои се вработени во Агенцијата за разузнавање и со уште двајца вработени во државните институции започнале со криминалните активности против државата. - Петмината работеле за странски разузнавачки служби, прибирале информации на незаконски начин и ги продавале, а се однесувале на безбедносните институции, политичката состојба во државата, изборите, одредени ризици, имиња на лица за кои се воделе одредени процеси, податоци за тие лица, класифицирани информации за верски заедници и нивни радикални структури - соопшти Јанкуловска. Во 2010 на групата и се придружиле и вработени во военото разузнавање, во еден мобилен оператор како и сопственици на медиуми, газди на приватни компании и други вработени во државни институции. - Имаме информации за соработката на оваа група со повеќе странски разузнавачки служби, но главно нивната соработка се водела една соседна држава - рече министерката. http://www.youtube.com/watch?v=rdgXDqmZWSs