Комората на извршители донесе одлука да ја поддржи мерката за отпис на долговите на граѓаните. Како што објави Фактор, претставниците на извршителите денеска имаа средба во Министерството за финансии за да ги договорат деталите. На само неколку дена пред истекот на рокот за пријавување за компаниите и извршителите, имаше повеќе нејаснотии околу тоа како се спроведува тој процес, особено затоа секој извршител во земјава требаше сам да одлучи дали ќе отпишува долг или не. „Извршителите се откажуваат од наградата и трошоците, направени во постапката на извршување. Очекуваме дека на овој начин ќе придонесеме за подобрување на животниот стандард на граѓаните“, вели Зоран Петрески, претседател на Комората на извршители. По банките и ЕВН одлучи да се пријави на огласот и да учествува во отписот на долговите. По завршувањето на интерните процедури, тие во предвидениот рок ќе се пријават на владиниот оглас. Огласот трае до 10 август, а кон средината на месецов треба да започне пријавувањето и на граѓаните кои ги исполнуваат условите да им бидат простени долговите.