Извршителите наплатиле 123 милиони евра во 2019 според годишниот извештај кој Комората тукушто го објави за 2019. Примени биле 121.913 барања за извршување, што е најголема бројка од 2016 кога извршителите примиле 227.836 барања за извршување. 

Станува збор за 123.255.351 милиони евра, или слично како и една година претходно со 3,7 милиони евра помала присилна наплата. Во последните осум години наплатата редовно изнесува преку 100 милиони евра, а рекордната е убедливо 2017 со 166.224.905 милиони евра.

Зголемен е износот на реализирани извршни решенија во корист на државата како доверител од 2,33 на 2,9 милиони евра. Сумите за стопанството и за поединците како доверители се намалени. Така, за правните лица наплатата паднала од 103 на 99,7 милиони евра, а за физичките од 22,4 на 21,9 милиони евра.

Според наплатените средства според структурата на должници, извршувањето од државните институции како министерства, агенции, управи, фондови, заводи, комисии, дирекции и слично, изнесува рекордна сума од 21.992.815 евра. Ова е убедливо најголема наплата од државата како должник. Претходно највисоките наплати по вина на државата се во 2018 и 2015 кога сумите изнесувале 15,95, односно 15,75 милиони евра. Во 2017 на пример таа била 11,6 милиони евра.

Од друга страна присилната наплата од стопанството бележи големо намалување и тоа изнесува 67,93 милиони евра. Тоа е многу помалку од 2017, кога се забележани дури 122,5 милиони евра. Во 2018 присилно биле одземени од фирмите 78,8 милиони евра. Кај физичките лица-должници нема големи промени во однос на изминатите години и таа изнесува 34,75 милиони евра.

Комората годината 2019 ја завршила со 91 извршител, или шест помалку во однос на претходната година. Бројот е најмал во последните девет години. Особено осетливо е намален и бројот на вработени во канцелариите на извршителите на 362 работници. Тоа е помалку за 60 за една година, а низа претходни години нивниот број изнесувал преку 500-тини.

А.К.