Изгоре фабриката Винчини во Виница, неизвесна судбината на најмалку 400 работници
Најмалку 400 работници од фабриката за кондиторски производи Винчини од Виница остануваат на улица, откако синоќа до темел изгоре производствениот погон, магацините полни со роба и административниот дел од фабриката, информира регионалната телевизија ТВ Стар.
Ова за економијата во Виница е најголем удар досега бидејќи Винчини вкупно вработува 500 лица. За 100 - тина од нив работен ангажман ќе има во дисперзираните погони но останатите се во комплетна неизвесност.
За сопствениците штетата е милионска, а точната сума ќе се знае откако на лице место ќе излезат проценителите од осигурителните компании.
Винчини располагаше со високо софистицирана роботска технологија за производство што овозможуваше извоз во 54 земји во светот.
Винчини е најголем извозник на кондиторски производи во државата, а извозот лани бил во вредност од 35,8 милиони евра.
Претседателот на Стопанската комора Бранко Азески синоќа бил известeн од сопственикот на Макпрогрес Виница, Глигор Цветанов, дека во фабриката има пожар. Од Стопанската комора на РСМ информираат дека веднаш била алармирана Владата, премиерот, како и вицепремиерот и министер за транспорт и дека три клучни погони се целосно уништетни.
„Стопанската комора изразува жалење за ваквата трагедија која ќе остави длабока трага врз работењето на една од најуспешните извозни компании во Македонија, во групата на најпознати компании во кондиторската индустрија, препознаена по брендот „Винчини“. Макпрогрес Виница е истакната наша членка која предничи со своите активности и во работењето на Комората, и во градењето деловен амбиент во државата. Членови на сопственичката структура секогаш се наоѓале во врвот на раководството на Стопанската комора“, информираат од таму.
Слично
Поврзани вести
