Ноќеска пратениците во црногорскиот парламент и изгласаа недоверба на владата на Дритан Абазовиќ. 

Вкупно 50 пратеници од Демократската партија на социјалистите, демократите, социјалдемократите, Социјалдемократската партија, Либералната партија, Демократскиот сојуз на Албанците и Права Црна Гора гласаа за недоверба на 43-та Влада на Црна Гора, додека пратениците од Демократскиот фронт, Граѓанското движење УРА и Социјалистичката народна партија (СНП) ја напуштија салата пред да гласаат, објави „Нова.рс“.

Предлогот за недоверба на Владата го поднесоа 36 пратеници на Демократската партија на социјалистите (ДПС), Социјалдемократската партија, Либералната партија, Социјалдемократите и Демократскиот сојуз на Албанците, само неколку часа откако Абазовиќ го потпиша Основен договор со Патријархот на Српската православна црква, Порфири.

На вечерашната расправа во парламентот, Абазовиќ рече дека целта на гласањето за падот на неговата влада е само една, а се однесува на напуштање на политичката сцена - „или Дритан Абазовиќ или Мило Ѓукановиќ“.

- Ова е политичка пресметка во која некој треба да добие предност. Со оглед на тоа што сум политички и финансиски многу послаб, веројатно однапред се знае победникот. Но, тоа не значи дека некој друг нема да го земе факелот и да го вклучи светлото - рече Абазовиќ.

Тој истакна дека од 30 август 2020 година не престануваат бројните притисоци врз него, но дека нема страв бидејќи е убеден во искреноста на неговите постапки.

Абазовиќ претходно изјави дека неговото Граѓанско движење УРА нема да учествува во преговорите за формирање на нова извршна власт, доколку падне владата што ја предводи.

- Вечерва имаме опција да гласаме или не да гласаме за иницијативата на ДПС. Ако вечерва падне владата, нека ви е со среќа. Не го нарекувајте повеќе движењето УРА - рече Абазовиќ како одговор на коментарите на пратениците.

Тој посочи дека иницијативата на Демократската партија на социјалистите (ДПС) за соборување на владата е поднесена по потпишувањето на Основниот договор со СПЦ.

- Иницијативата на ДПС дојде како резултат на потпишувањето на Основниот договор. Кога реков дека има луѓе кои гласно го бранат Основниот договор, за некои од нив тврдам дека немало да го потпишат. Не трепнав и не го направив ова за гласови и поддршка, туку за помирување на народот во Црна Гора, особено на православниот народ. И јас сум горд на тоа - потенцираше Абазовиќ.

Фото: gov.me