Народната банка на Република Македонија издаде две нови ковани монети за колекционерски цели.

Од НБРМ информираат  дека се издадени и пуштени во оптек кованите пари  „Година на петелот – петел со ангел“, и „Година на петелот – ветроказ со петел“.

Овие ковани пари се изработени од сребро Аg925, со тежина на среброто од 28,28 г, чистота на среброто 26,16 г, и во кружна форма со димензија 38,61 мм.

Кованата пара „Година на петелот – петел со ангел“  на аверсот, во центарот на кованата пара се претставени грбот на Република Македонија и натписот „2017“. Околу монетата, по должината на периметарот, се прикажани натписите на македонски јазик: „Република Македонија“ и „100 денари“. На реверсот, во центарот  е прикажана слика на ангел во боја кој седи во запрежна кола влечена од петел. Ангелот е опкружен со цвеќе. Под и над централниот дел на сликата е прикажан цветен орнамент. По должината на периметарот се наоѓа натпис „Среќна Година на петелот“ на англиски јазик.

Кај кованата пара „Година на петелот – ветроказ со петел“ на аверсот, во центарот на кованата пара се претставени грбот на Република Македонија и натписот „2017“. Околу монетата, по должината на периметарот, има натписи на македонски јазик: „Република Македонија“ и „100 денари“. На реверсот, во центарот  е претставена слика на петел во боја, во облик на ветроказ, со сонце во заднината. Под петелот е прикажана годината на петелот – „2017“. По должината на периметарот стои натпис „Среќна Година на петелот“ на англиски јазик.

Цената на кованите пари „Година на петелот – петел со ангел“ и „Година на петелот – ветроказ со петел“ изнесува 3.500 денари.

Кованите пари на НБРМ за колекционерски цели  се законско средство за плаќање во Македонија.

Минатиот месец беше пуштена монета со ликот на Мајка Тереза.