Реакциите за починати, иселени и „фантомски“ гласачи на Избирачкиот список, не стивнуваат откако Државната изборна комисија ја промовираше веб-апликацијата за проверка на гласачите.

Граѓани на социјалните мрежи пишуваат дека на нивните адреси живеаат луѓе кои тие не ги познаваат, дека на списокот има починати лица и дека има лица кои повеќе години се иселени од Македонија. Освен тоа, забележани се и фиктивни влезови, станови, напуштени куќи, по 50-60 лица во еден стан, како и стари имиња на улици.

Најчесто се укажува на тоа дека на списокот на секоја од улиците Максим Горки, Димче Мирчев, Васил Ѓоргов и Киро Крстевски-Платник во центарот на Скопје има барем по еден стан со 60 регистрирани станари.

Додека во јавноста се откриваат фалинките во избирачкиот список, започна и вкрстената проверка на податоците од десет државни институции, која треба да заврши кон почетокот на наредната недела.

Прочистувањето на избирачкиот список беше една од клучните точки од Договорот од Пржино, а треба да биде ставен на увид на 17 април доколку предвремените парламентарни избори се одржат според сега предвидениот термин, на 5 јуни.