Претседателот на Република Македонија, Ѓорге Иванов, присуствуваше на приемот по повод верскиот празник Курбан-бајрам, на покана на поглаварот на Исламската верска заедница, реис-ул-улема ефенди Сулејман Реџепи. - Mакедонскиот претседател со своето традиционално присуството на прославите на муслиманските празници и средбите со претставниците на ИВЗ, испраќа пораки дека меѓуверското и меѓурелигиското почитување е наша заедничка цел која единствено може да донесе просперитетна иднина и благосостојба за сите граѓани на Република Македонија, соопшти Кабинетот на Претседателот. Честитајќи го празникот, претседателот Иванов изрази очекување дека припадниците на исламската верска заедница, како нераскинлив дел од македонското општество, и понатаму ќе бидат активни чинители во градењето на соживот во Република Македонија. На приемот присуствува и премиерот Емил Димитриев. Честитки за големиот муслимански празник испратија сите политички партии и субјекти во Република Македонија.