Актуелниот шеф на државата Ѓорге Иванов доби уште еден  мандат на претседателската функција, покажуваат податоците на Државната изборна комисија, која ги преброи речиси сите 100% од гласовите на вчерашниот втор круг од претседателските избори. Според нив, Иванов освоил 534.154 гласа, додека неговиот противкандидат Стево Пендаровски од СДСМ - 398.008 гласа. Пендаровски успеал да го победи Иванов во десет општини, додека во сите останати мнозинството гласови отишло кај Иванов. На вчерашниот втор круг од претседателските избори на гласање излегле 54,33% од избирачите запишани во избирачкиот список, со што беше надминат потребниот цензус од 40% за успешност на изборите. Иванов доби нов петгодишен мандат, кој започнува да тече по инаугурацијата следниот месец.