Датум за почеток на преговорите со Македонија во декември побарал претседателот Ѓорге Иванов, на средба со еврокомесарот за проширување Штефан Филе. Посетата на Иванов во европските институции во Брисел е прва во неговиот нов мандат, но веројатно и последна во овој состав на Европската комисија, која „брои ситно“ до новите избори. Сепак, Иванов истакнал дека статус кво состојбата создава фрустрации за нашата земја и побарал Македонија што поскоро да ги започне преговорите. „Република Македонија бара на претстојниот самит да биде применет позитивниот пример на паралелно движење , во интеграцискиот процес и во надминувањето на билатералната разлика“, порачал претседателот Иванов. Филе, пак, од своја страна, побарал да продолжи реформскиот процес во земјава, а посебен фокус ставил на забелешките на ОБСЕ/ОДИХР за последниот изборен процес. Иванов во Брисел требаше да одржи пресконференција заедно со претседавачот со Европскиот совет, но беше откажана заради смртта на поранешниот белгиски премиер Жан-Лук Дехен.