Холдинг компанијата Exor, во сопственост на богатото семејство Ањели, италијанска династија на индустријалци, презеде 15 отсто од акциите на Philips, објави денеска холандската технолошка компанија.

Според портпаролот на Philips, Exor ги купила акциите за 2,6 милијарди евра.

- Оваа инвестиција на Exor целосно го поддржува лидерството, стратегијата и потенцијалот за создавање вредност на Philips и му овозможува на Exor да назначи еден член во надзорниот одбор на Philips - се вели во соопштението на холандската компанија.

Exor засега нема краткорочни планови за дополнително зголемување на својот удел, како што се наведува во соопштението, но според условите од договорот, може да го зголеми својот удел на 20 проценти.

Извршниот директор на Exor и наследник на семејството Ањели, Џон Елкан, рече дека фокусот на Philips на здравствената заштита, како и технологијата, е во согласност со посветеноста на Exor.

Ексор има акции во групи како Стелантис, Ферари и Ивеко, но и во италијанскиот фудбалски клуб Јувентус од Торино. По продажбата на компанијата Partner Re во 2021 година за 9,3 милијарди евра, Exor започна да се проширува во здравството со низа инвестиции, со што се здоби со малцински удели во здравствените групи како што се францускиот институт Mérieux и италијанскиот Lifenet.

- Гледајќи напред кон 2022 година, можам со сигурност да споделам со вас дека нашата работа на здравството го засили ставот дека за нас има реални можности во овој сектор и нашиот интерес само порасна - напиша Елкан во писмото до акционерите во април. Компанијата исто така инвестираше во технолошки групи како што се Welltec и Via Transportation.

Интересно е што минатиот месец Lingotto, инвестициска компанија со седиште во Лондон и во сопственост на Exor, вложи милиони во британскиот производител на чипови Optalysys. Диверзификацијата беше во срцето на стратегијата на Елкан по спојувањето на неговата семејна група Фиат Крајслер Автомобили со францускиот Пежо. Историски, бизнисот на семејството Ањелис бил фокусиран на автомобилскиот сектор, но тие инвестирале во медиумите, па го поседуваат и торинскиот весник La Stampa, а инвестирале и во магазинот The Economist.