Италија се соочува со масовно пензионирање во следната деценија, бидејќи повеќе од шест милиони работници ќе го напуштат пазарот на трудот, предупреди денес претседателот на Националниот институт за анализа на јавни политики (INAPP), Натале Форлани.

- За само 10 години, околу 6,1 милиони Италијанци ќе го напуштат пазарот на трудот - изјави Форлани пред парламентарната комисија за демографска транзиција, пренесува Анса.

Според него, овој „генерациски егзодус“ претставува сериозен предизвик за италијанскиот пензиски систем, бидејќи нема доволно млади работници да ги заменат, а бројот на даночни обврзници што ги полнат државните фондови се намалува.

Форлани нагласи дека самото зголемување на возраста за пензионирање не е доволно, туку потребни се сеопфатни политики што ќе ја обноват работната сила со поттикнување на наталитетот или миграцијата и „ќе ги направат социјалните трошоци одржливи на долг рок“.

До 2060 година, населението во работоспособна возраст (на возраст од 20 до 64 години) ќе се намали за дури 34 проценти, што директно ќе го загрози економскиот раст, одржливоста на јавните трошоци и стабилноста на социјалниот систем.