Земјотрес рано утрово ја потресе Србија. 

Граѓаните на Сомбор, Апатин и околните градови почувствуваа силен земјотрес што го погоди подрачјето на Сомбор, поточно Бездан во 2:35 часот наутро, на длабочина од 15 километри, како и уште еден многу послаб.

Најмногу штети се пријавени во селото Моноштор, каде што жители сведочат дека потресот бил силен, краток и доволно интензивен за да ги разбуди луѓето. Во повеќе куќи се појавиле пукнатини на ѕидовите, а оштетувања биле забележани и кај објекти од понова градба. Се треселе цели куќи, паѓале слики од ѕидови, а жителите во страв излегувале надвор за да видат што се случува.

Оштетена е и месната црква „Свети Петар и Павле“ во Моноштор, каде што од таванот отпаднале поголеми парчиња малтер. Поради оштетувањата се очекува инспекциски преглед на објектот, а првичните информации од теренот говорат дека нема повредени лица.