Празникот се празнува по повод основањето на Македонската револуционерна организација во Солун. Имено на 23 октомври 1893 година во куќата на солунскиот книжар Иван Хаџи Николов во Солун се собрале шестмина млади мажи за да ги ставаат основите на тоа, коешто ќе стане симбол и знаме на борбите на Македонците за слобода. Основоположниците биле: Д-рХристо Татарчев, Даме Груев, Петар Поп Aрсов, Иван Хаџи Николов, Антон Димитров и Христо Батанџиев. Тие основаат конспиративна група, нарекувајќи ја Македонски револуционерен комитет. Организацијата се борела за ослободување на Македонија со сопствени сили, без помош од надвор. Формирањето на ВМРО значело почеток на организираното македонско револуционерно движење кое преку Илинден 1903 и Крушевската република, преку НОВ резултира со создавањесовремена самостојна македонска држава.

Овој датум се поврзува со организираната борба на македонскиот народ и на националностите кои живееле на оваа територија, за формирање независна држава. Во политичка смисла, тогаш борбата за автономија значела формирање самостојна држава. Затоа 23 октомври симболизира континуитет на македонската борба за независност, што резултирал денеска да имаме сопствена, независна држава.

Прослава

Во чест на Денот на Македонската револуционерна борба низ цела Македонија се случуваат разни свечености, концерти, спортски натрепави и сл.

Официјалната најголема Свечена академија се одржува во Македонската Опера и Балет, каде се обраќаат високите државни лица и историчари од МАНУ. Националната установа Центар за култура „Кочо Рацин“ во Кичево организира изложба на фотографии и средба со роднокрајните писатели. Изложбата е насловена како „Фото сафари 2008“ и се презентираат педесетина фотографии од 36 автори направени на поголем број локации во земјава под менторство на Сара Лин - уредник за фотографија во списанието „Национал географик“. Во Битола се положуваат венци на споменикот на НОАВМ и споменикот на илинденците.