Иран и Оман разгледуваат можност за воведување на постојан систем на наплата за пловидба низ Ормускиот теснец, еден од клучните енергетски коридори во светот, јавува Блумберг. Целта на предложениот систем е да се регулира и финансира поморскиот сообраќај, со можност за зајакнување на контрола над поминувањето на бродовите кои превезуваат нафта и гас.

„Потребно е да се мобилизираат сите ресурси за да се обезбеди безбедност и најефикасно управување со поморскиот сообраќај“, изјави иранскиот амбасадор во Франција, Мохамад Амин-Неджад. Според неговите зборови, одржувањето на таков систем подразбира значајни трошоци, а дел од товарот би требало да го сносат државите и компаниите кои имаат корист од поминувањето на бродовите. Тој потенцираше дека системот ќе биде транспарентен и достапен за сите учесници.

Во меѓувреме, Блумберг нагласува дека евентуално затворање на Ормускиот теснец до август би можело сериозно да ја загрози глобалната економија, со ризик од рецесија споредлива со финансиската криза од 2008 година. Најверојатниот сценарио предвидува повторно отворање на теснецот во јули, но тогаш глобалната побарувачка за нафта би можела да се намали за просечно 2,6 милиони барели дневно, додека цената на нафтата тип Брент на спот пазарот би можела да достигне и 130 долари за барел.

Овој развој дополнително ја нагласува ранливоста на глобалниот енергетски систем на политички и безбедносни тензии во регионот на Блискиот Исток, со директно влијание врз потрошувачите и индустријата ширум светот.