Поголемиот дел од граѓани на Македонија ги оценуваат како позитивни политиките на Владата за привлекување странски инвестиции, субвенциите во земјоделството и реформата на здравствениот систем, покажува анкетата на  Институтот за политички истражувања од Скопје (ИПИС). На прашањето „како ги оценувате следните политики на Владата: привлекување на странски инвестиции“, 59 отсто одговориле позитивно, 29,1 имаат негативен став, а без одговор биле 11,8 проценти од анкетираните. Позитивна оценка за субвенциите во земјоделство дале 70,1 отсто,  а негативно се изјасниле 18,7%. Реформата на здравствен систем позитивно ја оцениле 54,6 од испитаниците, негативно 34,8, а немале одговор 10,6 проценти.

46,2 отсто од анкетираните граѓани имаат позитивен став за политиките на Владата за процесот на евроинтеграциите , а негативен 30%, додека Извештајот на Европската комисија за напредокот на земјава позитивно го оценуваат 50,6 отсто од анкетираните, а 16,1%  негативно.

Високи 54% веруваат дека  ќе добиеме датум за почнување на преговорите за влез во ЕУ во декември годинава, а за 27 проценти тоа е нереално. 51,1%  негативно го оценуваат проектот „Скопје 2014“, додека позитивна оценка даваат 40,3% од испитаниците. Телефонската анкета која ја спроведе Институтот за политички истражувања од Скопје, траеше од 29 октомври до 1 ноември, а беа забележани одговорите на 1.115 граѓани.