Еуроњуз бизнис подетално анализира како се промениле цените на храната низ Европа во 2025 година и ги открива производите што забележале највисока инфлација.

Цените на храната во ЕУ се зголемиле во просек за 2,8 oтсто во 2025 година во споредба со претходната година. Инфлацијата била значително повисока за некои производи, достигнувајќи до 10 отсто за одредени артикли, според податоците на Евростат. 

Цените во Турција драстично се зголемиле

Турција беше јасен исклучок во однос на инфлацијата на храната, при што цените пораснале за дури 32,8 отсто во 2025 година, што дополнително ги истакнува пошироките инфлациски проблеми на земјата.

Во рамките на ЕУ, Романија забележа највисока инфлација на храната од 6,7 отсто. Инфлацијата на храната остана висока во делови од Источна и Југоисточна Европа во текот на 2025 година. Романија, Бугарија, балтичките држави и Балканот претежно регистрирале стапки помеѓу 4 отсто и 7 отсто, што е далеку над просекот на ЕУ. Швајцарија беше единствената земја каде што цените на храната паднаа, за 1,1 отсто. Цените на Кипар останаа непроменети.

Меѓу „големата четворка“ на ЕУ, Франција забележа најниска стапка од 0,7 отсто. Тоа е исто така трета најниска инфлација на храна меѓу 36 европски земји.

Инфлацијата беше 2,1отсто во Германија и Шпанија, додека Италија имаше највисока стапка меѓу водечките економии на ЕУ, со 2,5 отсто.

Инфлацијата е двоцифрена за чоколадо, замрзнато овошје, говедско и телешко месо

Од 64-те вообичаени прехранбени производи што ги следи Евростат, цените паднаа за осум производи, а останаа непроменети за еден. Сите други забележаа раст на цените со различни стапки во 2025 година во споредба со 2024 година.

Три производи забележаа двоцифрена инфлација. Цените на чоколадото пораснаа најмногу, за 17,8 отсто, додека замрзнатото овошје поскапи за 13 отсто, а говедското и телешкото за 10 отсто.

Покрај трите најпогодени производи, неколку други прехранбени производи исто така забележаа значително зголемување на цените.

Цените на јајцата се зголемија за 8,4 отсто, на путерот за 8,3 отсто, додека јагнешкото и козјото месо поскапеа за 7,2 отсто. Шеќерот, џемот и медот поскапеа за 6,8 отсто, додека цената на свежото млеко се зголеми за 5,7 отсто. Производите од коренест зеленчук поскапеа за 5,5 отсто, свежото или ладеното овошје за 5,4 отсто, додека овошјето како целина поскапи за 5,3 отсто. Маслата и конзервираното овошје поскапеа за 4,7 отсто, цените на живината се зголемија за 4,4 отсто, додека цените на сувото овошје и јаткастите плодови се зголемија за 4,2 отсто. 

foto freepik.com/KamranAydinov