Индиските рафинерии купија, за прв пат по седум години, иранска нафта поради прекини во снабдувањето преку Ормутскиот теснец предизвикани од конфликтот на Блискиот Исток, објави синоќа индиското Министерство за нафта.

Како трет најголем увозник и потрошувач на нафта во светот, Индија не добила никакви пратки од Техеран од мај 2019 година, по притисокот од САД да не купува иранска сурова нафта, објавува Ројтерс.

Сепак, прекините во снабдувањето предизвикани од американско-израелската војна силно ја погодија оваа јужноазиска земја, додава агенцијата.

„Поради прекините во снабдувањето од Блискиот Исток, индиските рафинерии обезбедија потребни количини сурова нафта, вклучително и од Иран, нема пречки во плаќањето за увоз на иранска нафта“, соопшти Министерството на платформата X.

Минатиот месец, САД привремено ги укинаа санкциите за иранската нафта и рафинирани производи за да го ублажат недостигот на пазарот.

Министерството додаде дека Индија ги обезбедила потребните количини сурова нафта за наредните месеци.

Индија увезува сурова нафта од повеќе од 40 земји.

„Индија увезува сурова нафта од повеќе од 40 земји, а компаниите имаат целосна флексибилност да набавуваат нафта од различни извори и региони врз основа на комерцијални услови“, се наведува во соопштението.

Индија купи 44.000 метрички тони ирански течен нафтен гас (LPG) натоварен на брод под санкции.

Министерството објави дека бродот, кој во среда се закотви во западното пристаниште Мангалор, моментално истоварува гориво, пренесува Танјуг.