Централната банка на Индија (RBI) предложи земјите од БРИКС да ги поврзат своите дигитални валути за да го олеснат прекуграничното тргување и туристичките плаќања, што би можело да ја намали зависноста од американскиот долар.

Централната банка на Индија, РБИ, ѝ препорача на индиската влада овој предлог да биде вклучен во агендата на самитот на БРИКС во 2026 година, чиј домаќин ќе биде Индија, изјавија за Ројтерс два анонимни извори.

Доколку иницијативата биде прифатена, тоа ќе биде првиот формален предлог за меѓусебно поврзување на дигиталните валути на членовите на тој блок.

Предлогот на RBI е продолжение на декларацијата усвоена на самитот на БРИКС во Рио де Жанеиро во 2025 година, во која се истакна потребата од меѓусебно поврзување на системите за плаќање на членовите за да се овозможат побрзи и поефикасни прекугранични плаќања.

Банката претходно покажа интерес за поврзување на индиската дигитална рупија со дигиталните валути на други земји, но секогаш нагласуваше дека овие напори не се насочени кон дедоларизација.

Дигиталната рупија, воведена во декември 2022 година, досега има околу седум милиони корисници, бидејќи Кина се стреми да ја прошири меѓународната употреба на дигиталниот јуан.

Изворите наведуваат дека заедничките технолошки стандарди, јасните правила за управување и механизмите за решавање на трговските нерамнотежи, вклучително и можноста за користење на билатерални договори за размена на девизи меѓу централните банки, ќе бидат клучни за успехот на иницијативата.

Групата БРИКС ја сочинуваат Бразил, Русија, Индија, Кина и Јужна Африка, заедно со поновите членки како што се Обединетите Арапски Емирати, Иран и Индонезија.

Иницијативата би можела да предизвика незадоволство во Соединетите Американски Држави, кои претходно предупредија на обиди за заобиколување на доларот.

Американскиот претседател Доналд Трамп претходно го опиша БРИКС како „антиамерикански сојуз“ и се закани дека ќе воведе царини за неговите членки.

foto Wikipedia