За 10 места напреднала Македонија според индексот за просперитет што го мери британскиот Легатум Институт. Од вкупно 142 рангирани земји во светот, Македонија годинава се најде на 69-тото место, што е подобрување за 10 позиции во однос на лани. Индексот на просперитет се пресметува врз основа на осум категории: економија, образование, претприемништво и можности, управување, здравје, лична слобода и безбедност и социјална состојба. Од сите овие категории, земјава е рангирана највисоко во сегментот „здравство“, каде што се најде на 52-та позиција, а најниско за категоријата „социјална состојба“ - на 82-то место. Според овој индекс, најпросперитетна држава во светот е Норвешка, а по неа следат Швајцарија, Нов Зеланд, Данска, Канада, Шведска, Австралија, Финска, Холандија и САД. На дното на листата, пак, се Демократска Република Конго, Чад и Централноафриканската Република. На Балканот, како најпросперитетна држава е оценета Словенија - на 24-тата позиција. Бугарија, Хрватска и Црна Гора се подобро рангирани од Македонија, додека Србија, Албанија и Босна и Херцеговина имаат полоша позиција.