Илчо Ѓорѓиоски пред да биде уапсен добил насад под закуп од државата
Поранешниот претседател на Фудбалската федерација на Македонија, Илчо Ѓорѓиоскји, добил 1,8 хектари (18.000 метри квадратни) насад за лешници во долината помеѓу Валандово и Гевгелија пред да биде објавена вчерашната информација дека е уапсен во истрага на Обвинителството, Управата за финансиска полиција и МВР.
Одобрувањето од страна на владата за склучување на договор за закуп на земјоделско земјиште со непосредна спогодба била донесена како одлука на седница на 2 јуни, а на министерот за земјоделство, шумарство и водостопанство, му било наложено да го потпише во рок од 30 дена.
„Со оваа одлука се дава согласност за склучување на договор за закуп на земјоделско земјиште со непосредна спогодба со Илчо Ѓорѓиоски, ул. "Христо Батанџиев" бр. 49, Ѓорче Петров, Скопје, за земјоделско земјиште под долгогодишен насад лешник со вкупна површина од 1 ха 79 ар 53 м.... во сопственост на Република Северна Македонија“, објавено е во одлуката.
Од Министерството за земјоделство велат дека станува збор за процедура на купопродажба од стар на нов корисник.
„Во конкретниот случај не станува збор за директно доделување на државно земјоделско земјиште од страна на Министерството на лицето Илчо Ѓорѓиоски. Во конкретниот случај се работи за договор за купопродажба на насади помеѓу приватни лица. Имено, согласно Законот за земјоделско земјиште, во случај на склучен договор за купопродажба на насади, министерството е должно да изврши пренос на правата и обврските од веќе постоечкиот договор за закуп, склучен помеѓу државата и претходниот закупец на новиот сопственик, со претходна согласност од Владата на РСМ“, велат од министерството.
Двајца поранешни претседатели на Фудбалската федерација на Македонија (ФФМ), раководителка на Одделението за финансии и сметкводство при ФФМ и сопственици и овластени лица на фирми се осомничени за финансиски манипуалции и криминал поради кои „куќата на фудбалот“ е оштетена за сума од над 180 милиони денари или околу три милиони евра.
Во акцијата се приведени 12 лица, додека пет лица се недостапни на органите на прогонот. Основното јавно обвинителство за гонење на организиран криминал и корупција не го наведува идентитетот на осомничените. Дел од медиумите веќе објавија дека во акцијата е приведен поранешниот претседател на ФФМ, Илчо Ѓорѓиоски. Тој беше на чело на Фудбалската федерација на Македонија во перидот 2012 до 2018 година кога е сторено кривичното дело наведено во соопштението на Обвинителството.
Другиот осомничен поранешен претседател на ФФМ, според периодот на извршување на функцијата, но и по наводите на Обвинителството дека е веќе во притвор за друга постапка, е Муамед Сејдини.
Сејдини беше уапсен во април годинава под сомнение дека проневерил околу 700 000 евра, средства што Европската фудбалска организација (УЕФА) ѝ ги доделила на ФФМ за градежни работи на стадионот во Охрид. Инаку, според надлежното Обвинителство, по поднесената кривична пријава од Управата за финансиска полиција донесена е наредба со спроведување истражна постапка против 18 физички и осум правни лица, односно фирми. За двајцата поранешни поранешни претседатели на ФФМ, постои основано сомневање дека сториле кривично дело проневера во службата
Името на Ѓорѓиоски, со години се поврзува во јавноста со поранешниот премиер Никола Груевски. Причината за тоа, според медиумски извештаи, е нивното долгогодишно пријателство кое датира од детството поминато во скопската населба Ѓорче Петров.
Ѓорѓиоски, поранешен фудбалер и тренер, во 2012 година беше избран за претседател на ФФМ и на таа функција остана до 2018 година. Во текот на неговиот мандат, дел од медиумите и критичарите тврдеа дека неговата близина со тогашната владејачка структура предводена од Груевски му помогнала во подемот во македонскиот фудбал, иако за таквите тврдења никогаш не беа презентирани официјални докази.
Во јавноста често се споменуваше дека двајцата потекнуваат од истото маало во Ѓорче Петров и дека останале во добри односи и откако нивните кариери тргнале во различни насоки – едниот во политиката, а другиот во спортот.
А.К.
Слично
Поврзани вести
