Министерот за економија и одржлив развој на Хрватска, Давор Филиповиќ на состанокот на Советот за транспорт, телекомуникации и енергија во Луксембург најави дека Хрватска ќе се погрижи складиштето за гас да биде исполнето до крајот на октомври.

На состанокот во Луксембург беше усвоена Регулативата за складирање на гас за да се обезбеди предзимско складирање и дистрибуција меѓу земјите-членки во дух на солидарност. 

- Регулативата е важен чекор кон зајакнување на безбедноста на снабдувањето со енергија на ЕУ во контекст на војната во Украина - се вели во соопштението на Министерството за економија и одржлив развој.

На состанокот на Советот, министрите се согласиле и за заедничките позиции за два законски предлози кои се однесуваат на енергетските аспекти на климатската транзиција на ЕУ во рамките на пакетот „Подготвени за 55“ - Директивата за енергетска ефикасност и Директивата за обновливи извори на енергија, кои ќе помогнат да се постигнат климатските цели и намалување на енергетската зависност од Русија. Овој договор го отвора патот на Советот да започне преговори со Европскиот парламент.

Во соопштението на ресорното министерство се посочува и дека биле разменети мислења за енергетската состојба во Европа во контекст на војната во Украина.

Министерот Филиповиќ посочи дека Хрватска ќе се погрижи складиштето за гас да биде исполнето до крајот на октомври.

- На ниво на ЕУ, го поздравуваме фактот што Комисијата ја следи ситуацијата и го ажурира планот за подготвеност, бидејќи тоа ни овозможува правилно да реагираме на можни итни случаи. Ние, исто така, поддржуваме доброволна платформа за набавка на гас на ЕУ. Инвестицијата во хрватскиот гасоводен систем значително ќе ја зголеми сигурноста во снабдувањето на среден рок. Нашите проекти се готови, а се планира зголемување на капацитетот на терминалите за ЛНГ на островот Крк за 6,1 милијарди кубни метри. Со тоа би се обезбедиле нови количини гас за Словенија, Унгарија и Босна и Херцеговина - рече министерот Филиповиќ.

Претседателството на средбата ги информираше министрите за извештаите за напредокот на предлогот за регулатива за намалување на емисиите на метан во ЕУ и за предлогот за енергетска ефикасност на зградите.

Министрите, исто така, ќе се обидат да постигнат општ пристап за предлогот за намалување на ризикот од уништување на шумите и деградација на шумите поврзани со производите пласирани на пазарот на ЕУ.