Хрватската претседателка очекува Хрватска до 2020 да го преземе еврото како национална валута, иако актуелната влада на најмладата членка на ЕУ одбива да го одреди датумот.

Воведувањето на еврото е единствено несогласување помеѓу шефицата на државата Колинда Грабар Китаровиќ и премиерот Зоран Милановиќ.

Според мислењето на Грабар Китаровиќ, воведувањето на еврото во наредните пет години е важно за хрватската економија, бидејќи како што нагласува во интервју за агенцијата Блумберг, „тесно е поврзано со економијата на Унијата“.

Првата жена на чело на Хрватска смета дека подготовките на економијата за пресудните предизвици, вклучувајќи го и воведувањето на еврото, бара поголема соработка помеѓу вработените и работодавачите, но и инвеститорите кои ќе бидат подготвени да вложуваат во континенталниот дел од земјата - далеку од туристички ориентираните и доминантни јадрански брегови, пренесува Вечерњи лист.

„Така ќе се решат структурните проблеми кои ги имаме во економијата. Имаме големи залихи на природни ресурси, образовани луѓе и мораме да се концентрираме пред се на тоа како управуваме со тие ресурси“, наведува Грабар и додала дека има големо искуство стекнато во текот на работниот ангажман надвор од Хрватска.

Таа рекла  дека сака да ја модернизира Хрватска во секој поглед, вклучувајќи ја и политиката.

„Мораме да го промениме моменталниот склоп и да создадеме услови како економијата би можела полесно да се развива“, иверено вели Грабар Китаровиќ.