Работниците во Хрватска ќе заминуваат во пензија на 67 години, објави хрватскиот министер за труд и пензиски систем Мирандо Мршиќ. Коментирајќи ги заклучоците на мисијата на ММФ за реформи на пензискиот систем, Мршиќ изјави дека ова е нешто што Хрватска не може да го избегне. „Ова не е нешто што ни претстои сега, во некоја блиска иднина. Како и сите земји во Европската унија, тоа е резервирано за втората половина на оваа деценија, но веројатно ќе мораме да ја усвоиме оваа мерка“ рече Мршиќ и додаде дека препораките на ММФ се сепак само препораки, а крајната одлука ја носи Владата. Хрватските синдикати ги повикаа вчера одговорните да се огласат на оваа „непримерна и луда“ препорака на ММФ за зголемување на старосната граница за заминување во пензија од 65 на 67 години.