Силно невреме проследено со оркански ветер, снег и ниски температури го погоди Загреб во текот на ноќта, предизвикувајќи сериозни проблеми низ градот и регионот.

Според локалните медиуми, ветерот корнел дрвја, оштетил инфраструктура и предизвикал прекини во јавниот превоз, особено на трамвајските линии, каде што поради паднати дрвја и оштетени водови делови од мрежата биле целосно парализирани.

Во градот биле регистрирани стотици интервенции на пожарникарите, а на некои локации имало и опасни ситуации, како паднати дрвја врз возила.

Дополнително, поради безбедносни причини, наставата во училиштата во Загреб и околината е откажана, а граѓаните добиле предупредувања за опасни временски услови.

Невремето донесе и нагло заладување – утринското чувство на температура се спуштило и до -8 степени, додека налетите на ветер достигнувале и до 90 километри на час.

Поради временските услови, дел од автопатите и железничките линии се затворени или сообраќајот се одвива со значителни отежнувања.

Надлежните служби се на терен и работат на расчистување и нормализирање на состојбата, додека граѓаните се повикани на претпазливост и избегнување непотребни движења.