Американскиот нискобуџетен авиопревозник Spirit Airlines објави дека веднаш започнува со гасење на своите операции, поради што сите летови се откажани, а патниците се повикани да не доаѓаат на аеродромите.

Како што соопшти матичната компанија Spirit Aviation Holdings, Inc., одлуката е донесена по неуспешни обиди за реструктурирање и обезбедување нови финансиски средства. Клучен фактор за ваквиот развој е наглиот раст на цените на горивото во последните недели, што дополнително го отежнало работењето.

• -Повеќе од 30 години Spirit Airlines имаше пионерска улога во правењето на авионските патувања подостапни. Но, наглиот и континуиран раст на цените на горивото нè остави без друга опција освен гасење на операциите – изјави извршниот директор Дејв Дејвис.

Тој додаде дека за опстанок на компанијата биле потребни неколку стотици милиони долари дополнителна ликвидност, која не можела да се обезбеди.

Компанијата најави дека автоматски ќе изврши поврат на средства за билетите купени директно со картичка, додека патниците што резервирале преку туристички агенции треба да се обратат кај посредниците. Надоместоците за ваучери и поени ќе се утврдуваат во рамки на постапката за банкрот.

Гасењето на Spirit Airlines претставува сериозен удар за американскиот пазар на авиопревоз, каде оваа компанија важеше за еден од најголемите нискобуџетни превозници со исклучително ниски цени. Се очекува ова да предизвика нарушувања, особено на рутите каде Spirit имаше доминантна позиција по цена.